Song 8 | KYG | STEP | Nasa'nimo'a ita'nimo nu'ale'mo ne'niya nasa'nimogagana huka maisanafe'mo nahau'niye. Nasa'nimogamo mai'nanesinana kumatega kagete'nae'mo kahae'na ne'nesugeno'ae'mo mago vekamo'a ani kavafe'mo hosu agesamo afa'a o'afiyesine.

Song of Solomon 8

1 Nasa'nimo'a ita'nimo nu'ale'mo ne'niya nasa'nimogagana huka maisanafe'mo nahau'niye. Nasa'nimogamo mai'nanesinana kumatega kagete'nae'mo kahae'na ne'nesugeno'ae'mo mago vekamo'a ani kavafe'mo hosu agesamo afa'a o'afiyesine. 2 Inagi nagaemo kagaemo kavaleli'na ita'nimo notegamo visugekae'mo kagaemo alagepa huka afa'a alika naya malegane. Nagaemo nofi alagafati anipi'mo alagepa haga nehiya ya'mo ali'na atete'na alo hu'na kamiguve, huno ha pai'niye.

3 Hoga ayateti'mo nageyutega male'neno lamaga ayateti'mo nagufale'mo natafau'niye. 4 Yulusalemu a'mafa'ne anagane, huno, lokiya gefati'mo hu'nae'mo, afela afu anaga'mogi koli hutale'a apaune nehaya afu'aife'mo lapakesamo afitetapa nahau nayamopafi'mo ne'nahaiya a kanomo aupati'mo haunetapa o'ateyo. Agai'amo hau'ninageno aupati'mo he tigiye, huno hapa pai'niye.

5 Ina la'amo'mo yahaofilagati'mo eno hau ayamopafi'mo hau'niya veka'amo agufale'mo atafautege'ana kako kili'ana hai'ana ne'a'ae, hu'a hu'nae.

Kagaemo apoli yosamo aepafi'mo havae'nanage'na kahaune'na kate'nove. Itakamo'mo ani yosa aepafi'mo alino kate'niye. Alino kate'niya a kanomo'mo ani yosa aepafi'mo alino kate'niye, huno ha pai'niye. 6 Mago vekamo'a alagena kava'amo hu ne'maleya kava huka nagaemo alika kaipafi'mo alagena kava'mo hugekana huka hu malo. Ani kava huka nagaemo alika kayamote'mo alagena kava'mo hugekana huka hu malo. Ani kavatefe'mo nahau nayamopafi'mo nahau'niya kava'mo lokiya'amo'mo fali kava'mo lokiya'agana huno hane'niye. Nagaefe'mo hau ayamopafi'mo ohau'nifi, hu'na nagesamo ne'afuva kava'mo'a nefaliya kavakana huno hane'niye. Nahau nayamopafi'mo ne'nahaiya kava'mo atagana huno nele. He, lusi kava huno nele. 7 Hau ayamopafi'mo nehaiya kava'mo'a atagana huno neleyanageno ani'mo'a afa'a aeno yu osegaiye. Ani'mo hesiya'mo'mo alagi aeno ati okaegaiye. Mago vekamo'mo a kanoe'mo, Nagaefe'mo kahau kayamopafi'mo kahausiyafe'mo muki moni'anileti'mo miya faiguve, huno ha paisigeno'ae'mo, afa'a ina agufa yane, huno huteno hosu aipamo kaligiye, huno hu'niye.

8 Lasatimo'mo aise a'mafa'nemo mai'nigeno nu'amo o'me'niye. Mago vekamo'mo aligefe'mo hisigetae'mo agaetegamo na agufa kava'mo hugune, huno apafi ge'niye.

9 Agaemo alagepa huno taonilefe'mo yafa lafi kegi'yagana huno mai'nisigetae'mo lagaemo ani yafa lafi kegi'yale'mo siluva yafateti'mo yatala no'mo kime kime haigune. Agaemo kitagana huno mai'nisigetae'mo lagaemo agaete'mo lokiya sita yosaleti'mo no'amo kigune, hu'a ha pai'nae.

10 Nagaemo mago yafa lafi kegi'yagana hu'na mai'nogeno nu'nimo'a lole yatala vegovego notalakana huno hane'niye. Ani afina'mo fiku naha mae'nige'nae'mo aulagale'mo alagepa hu'na mai'nove, huno hapa pai'niye.

11 Kini vekamo Salomoni'a nofi hoya'amo Malihamoni kotega hane'niye. Agaemo hoya'ale'mo yagai'a atesayafe'mo apavaleno apate'niye. Apakaemo nofi alagamo alisayafe'mo muki vaya'amogimo vani tauseni vani tauseni hu'a siluva yafateti'mo miya fai'a amisaya kava'mo hane'niye.

12 Hoya'nimo nagai'ni hoyamo naulagale'mo hane'niye. O Salomonigae, huno, vani tauseni siluva yafa'mo alitesanage'a hoyale'mo ne'yagaiya vaya'mogi tu hataleti tu hataleti hu'a aligae.

13 Hoyafi'mo ne'maina a'nimogae, huno, kagae'e'mo magokepi lokae'a mai'naya vaya'mogimo kagemo ne'afiye. Kagemo aige'na afino, huno ha pai'niye.

14 Nahau nayamopafi'mo ne'nahaiya veka'nimogae, huno, malage huka emikeno. Mago alagepa afela afumo'a alagepa atumo ne'aiya ya'mo havai teno hane'niya avelegamo nagu nagu huno haine ne'eya kava huka emikeno, huno ha pai'niye.